政情：大輝唔執「書」 抽吳得掂水

借財爺隔空過橋

唔好以為教育問題先會撻着大輝嘅神經，佢尋日出席立法會財經事務委員會會議，開宗明義問及與會嘅財政司司長曾俊華（鬍鬚曾），係咪要學吳得掂睇多啲書，如每月睇五十本書，以此學習新板斧，擺明寸爆聲稱每月可閱讀三十本書嘅吳得掂。

對於大輝變相寸爆吳得掂言論，鬍鬚曾回應時無加多腳落去，只係輕描淡寫話大輝如果有書籍介紹，佢歡迎而且會搵時間睇睇，一下子就將個波拋番畀大輝喇。

事實上，大輝同吳得掂二人屢次針鋒相對，近期最為人熟悉嘅一幕，同全港性系統評估（TSA）有關，委員會舉行公聽會聽取各方對小三TSA嘅意見，吳得掂以個人理由婉拒出席，其後大輝又狙擊吳得掂出席委員會出席率。但其實一個講緊會議出席率，另一個講緊議題出席率，總之都係各說各話，爭拗停不了。