政情：Greg蘇做逃兵 推公僕擋箭
被網民稱為「網絡二十三條」嘅《2014年版權（修訂）條例草案》明日於立法會恢復二讀闖關，最近網民於社交網站「洗版」呼籲反對草案，連日來已獲愈來愈多網民加入反對草案陣營。面對網民及反對團體一浪接一浪攻勢，負責《版權條例》嘅商務及經濟局局長蘇錦樑（Greg蘇）無視《版權條例》迅速發酵政治化，連日來由局內一批公務員站在最前線拆解。近日更傳出有關方面制訂推銷「網絡廿三條」嘅策略，就係唔想令事件政治化，所以唔好畀政治問責官員講解。如果呢個邏輯係成立嘅話，Greg蘇等高官仲有立足之地？
只顧出席團體活動
《版權條例》修例三年前因部分泛民議員拉布而胎死腹中，政府其後就草案重新諮詢公眾，並鐵定明日再到立法會闖關。不過，咪以為多咗時間去處理具爭議性問題就會較為穩妥，事件恰恰相反，身為商經局之首嘅Greg蘇過去多日只係蜻蜓點水，宏觀回應外界對於《版權條例》嘅批評，相反要直接回應網民嘅諸多質疑，埋身肉搏打輿論戰嘅責任，統統推晒畀一批公務員。
首先出來擋箭嘅係知識產權署署長梁家麗，佢一口氣接受多個電視台及電台訪問，嘗試拆解網民質疑。其後接力出場係商經局副秘書長黃福來，尋日早上同「版權及二次創作關注聯盟」代表同場愈辯愈明。及至下午，Greg蘇現身參觀競爭事務委員會辦公室，但佢會見傳媒時只係答咗幾個關於《版權條例》問題就走人。
商經局其後未知係咪「知衰」，即時「補鑊」舉行傳媒簡報會，惟擔大旗嘅係商經局常任秘書長容偉雄，等咗又等先至推出「官方懶人包」，遲咗幾拍先至有相應舉措，去抗衡網民反對草案嘅「懶人包」。
`Greg蘇無親身去解釋「官方懶人包」，究竟係咪另有重任？尋日晚上終於有答案。原來佢先後出席工商政黨三周年活動、新一屆新界鄉議局就職典禮活動，究竟事情孰輕孰重，答案不言而喻。
重要關頭經常甩轆
其實Greg蘇於重要關頭「甩轆」並非首次，而且事事慢幾拍，唔識洞悉先機，反而招惹爭議。早年有免費電視發牌風波，最近於成立旅遊業監管局工作被批歎慢板，加上今次《版權條例》於闖關前夕連番捱打。有建制派中人私下指，如果再見到有問責官員無承擔，睇怕遲早有人推出「官員懶人包」，間接教吓身為高官應該有嘅素養同承擔嘞。