「事有必至，理有固然」，有啲事遲早會發生，避都避唔到。好似國泰航空國際排名跌跌不休咁吖，咪就係理有固然囉，一間管理不善、醜聞多多嘅企業，有乜法子唔被唾棄吖！
嗱，澳洲航空評級網站選出全球十大最佳航空公司，新西蘭航空連續第三年榮膺首位，澳洲航空同阿提哈德航空分別排第二、三位，國泰排名跌出三甲，只得「梗頸四」咋。屋漏偏逢連夜雨，國泰喺過去兩年曾被選為世界最佳商務艙航空公司，今年亦桂冠不保，被新加坡航空取而代之，今次都可以話係「雙失」咯。
其實，國泰排名下跌，早已唔係乜嘢新聞。早前英國獨立航空服務調查機構公布「二○一五年全球最佳航空公司獎」，曾四度名列首位嘅國泰失去冠軍寶座，排名滑落至第三位。所以話，公眾眼睛係雪亮嘅，一間航空公司係進步定係退步，大家有眼睇，國泰排名一跌再跌，咪就係服務質素節節倒退嘅結果囉。話時話，國泰早前宣布改變旗下「馬可孛羅會」續會安排，新計分制被批評劫貧濟富，家陣服務質素每況愈下，不分彼此，遲早令富人同平民齊齊敬而遠之嘅咋。
講起真係令人唏噓，國泰以前形象正面，享負盛名，可以話係香港嘅名牌，點知近年好似撞邪咁，管理混亂，事故頻生，名氣就冇嘞，怨氣就大把。日前之嘛，國泰一日之內三度壞機，三班分別前往日本札幌、新加坡同日本東京嘅航機，不約而同臨起飛至發現故障，被迫延誤幾粒鐘，搞到八百多名乘客受影響，怨聲載道。準時係航空服務嘅基本要求，國泰發生事故當食生菜，延誤成為家常便飯，點可能唔有口皆悲吖。航空公司係一個城市嘅形象大使，國泰烏煙瘴氣，搞臭自己個招牌事小，損害香港形象事大吖。
話時話，國泰勞資雙方正就明年薪酬調整展開談判，工會列出四大訴求，包括加薪百分之六等，如果資方漠視訴求，唔排除農曆新年前發起罷工，都咪話唔令人擔心。係人都知，聖誕至農曆新年期間係出入境高峰期，萬一國泰到時又爆發工潮，肯定七國咁亂。
講起國泰嘅亂象，就唔可以唔提機票超賣嘅老問題，該公司用行內慣常做法作擋箭牌，一個機位賣多張機票，搞到經常出現有票無位坐嘅亂象，擺明店大欺客，當乘客係羊牯。大家話嘞，今時今日咁嘅服務態度點得吖？
咪話功夫茶唔提醒，國泰再不思改進，遲早被人唾棄，點止排名下跌咁簡單吖！