政情：鄉事派兵分三路攻民記

鄉事派逢選舉都要幫建制派「抬轎」，特別對民記最有微言，底因係民記多年來鮮有在新界傳統權益問題上據理力爭，因此鄉事派及民記一直暗戰連場。較為人熟悉係四年前區選，鄉事派曾於北區發動鄉事版「票債票償」，其後於上屆多區區議會正副主席與民記繼續爭位，各不相讓，包括十八鄉鄉事委員會主席梁福元曾披甲上陣，僅以八票之差落敗元朗區會副主席之位。

元朗北區大埔開戰

消息指，鄉事派今次最少於三區區議會，包括元朗、北區及大埔與民記開戰，其中於元朗區戰況最緊湊。據知鄉事派眾人以梁福元為首，有意拉攏泛民、個別建制派連成一線，至今已掌握十三、十四張鐵票，並正爭取手握三票嘅新民黨，以及多名有鄉事背景嘅議員力撐，希望取得過半數支持合力推舉喺區選自動當選嘅律師沈豪傑上陣，挑戰角逐連任主席嘅梁志祥。

有熟悉情況人士分析，新民黨關鍵三票嘅取向效果迥異，將影響該黨代表任區議會副主席嘅機會率；至於選擇投棄權票不得失任何一方，亦可能變成兩面不係人，因此極考驗該黨嘅政治智慧。

另一方面，鄉事派於北區區會亦蠢蠢欲動，有傳民記劉國勳「升呢」區議會副主席之路有暗湧，事關以上水鄉事委員會主席侯志強為首嘅北區鄉事派，一旦聯同泛民及獲得獨立建制派議員支持，有機會取得過半數支持重奪區議會副主席。

鄉事派與泛民聯手嘅情況或於大埔區會再現，今次係泛民疑攪局拉攏鄉事派支持，目標踢走民記黃碧嬌，改由溫和鄉事派擔任區議會副主席。但分析指要「闖關」成功，最大阻力係身兼鄉議局副主席嘅民記張學明，佢喺大埔鄉事派有決定性嘅影響力，因此大埔反民記壟斷區會正副主席一役難度甚高。