中環出更：高永文技癢 幫議員打針
進入冬季流感高峰期，食物及衞生局局長高永文尋日就到立法會邀請議員接種季節性流感疫苗，以鼓勵市民都打針預防流感。有議員叫本身係骨科醫生嘅高永文幫佢哋打流感針，原本腼腆推搪嘅高永文最後都係難抵一時技癢，幫咗田北辰同陳偉業（大舊）打針。打針一刻，班議員呱呱叫，七情上面扮晒痛，演技咁好，唔做演員真係嘥晒。
自言三年半冇幫過人打針嘅高醫生就話，好少打流感呢啲肌肉注射針，相信護士手勢會好啲。而成日「拉布」嘅大舊仲講笑話，高醫生係咪玩「王子復仇記」，搵支大支啲嘅針幫佢打，等佢打完冇得「拉布」喎。
被陳恒鑌作狀咬
其他議員打針時都好搞笑，好似陳克勤同陳恒鑌咁，護士同佢哋打針時，前者就呻話支針大支，擰轉面，後者就扮到好似好痛苦咁，仲捉住高醫生隻手，作狀咬落去，真係七情上面。不過，唔知佢哋係咪怕護士姐姐嬲嬲豬，所以之後都讚護士姐姐手勢好，一啲都唔痛喎。議員陳志全打針時就除咗件外衣，淨低件小背心，非常「性感」，即時全場起哄。不過，佢就不慎凸點，高醫生即刻攞塊宣傳牌畀佢遮住。
全體七十名議員當中，只有廿幾位有打針，而蔣麗芸（Ann）就喺高醫生、食衞局副局長陳肇始三催四請下都唔肯打針。Ann開頭就解釋話唔想浪費資源，留番啲針畀有需要嘅人，一時又話其實自細已經怕打針，究竟邊句先至真呢？
卓妮