有人話中國旅客係經濟大蛋糕，世界各地爭相搶食，真係冇講錯。人哋千方百計吸客，香港就不斷趕客，再咁落去，遲早連蛋糕碎都分唔到吖。
嗱，日本又出招嘞，計劃放寬消費稅政策，旅客購物滿五千日圓即大約三百港元，就可以退稅，比依家嘅一萬日圓門檻大幅降低一半，而退稅範圍亦由高價品擴大到工藝品等小額商品。
唔使問阿貴，日本主要想吸引更多中國旅客到當地消費。為咗刺激經濟，日本近年大力推動旅遊業，舊年旅客創新高至一千三百萬人次，帶來一百七十億美元收入，其中中國旅客增長最顯著，而且消費最豪，成為旅遊業最重要嘅客源。其實，日本去年十月已經擴大旅客購物退稅優惠，依家又準備加碼，可以講係相當進取，正如韓信點兵咁，旅客多多益善。咁又係呀，旅客等於財神爺，梗係愈多愈好喇，唔通學香港嫌錢腥自己倒米咩。
所以話，唔怕唔識貨，最怕貨比貨，日本不斷出招吸客，港府就一味等運到，旅遊業想唔入寒冬都幾難。家陣環球經濟陰霾密布，旅遊業本來可以作為基層勞工嘅避風港，可惜好景不常，家陣本港旅遊業唔止自身難保，仲連累埋零售、酒店、飲食等行業添。呢，近日名牌手袋店紛紛劈價促銷，業界嘅處境可想而知。
講起真係無奈，香港有中國十三億人口市場做後盾，加上交通發達、治安良好、中西薈萃等有利因素，旅遊業本來唔憂做，可惜港府無能，不思進取，加上激進組織興風作浪，搞到中港矛盾不斷升溫，趕客鬧劇無日無之，依家肥水流向別人田，想力挽狂瀾談何容易。大家有眼睇，當局成日話要挽救旅遊業，一時要吸引高端旅客，一時又要開拓海外市場，淨係返內地同京官洽商都唔知幾多次，結果推出過乜嘢措施吖？唔通真係以為靠旅發局宣傳就可以吸客？
講開又講，香港旅遊業無以為繼，原因係多方面嘅，除咗激進組織趕客、旅遊景點不足、周邊地區貨幣貶值、旅客消費模式改變等等，本港物價太貴亦係主要原因。好簡單，同一款名牌手袋，香港售價閒閒哋貴歐美幾成，唔嚇走旅客至奇喇。冇錯，羊毛出在羊身上，香港租金高企，商品價格自然唔會便宜得去邊，但唔通歐美城市嘅租金唔貴咩？點解香港樣樣商品都貴過人哋？業界飛擒大咬，等於殺雞取卵，係咪應該檢討下呢？
咁講喇，旅遊業冇錯係一個大蛋糕，最重要係港府同業界必須齊心合力，香港至可以分一杯羹，如果繼續不思進取，盞齊齊食穀種嘅咋。