由「好打得」嘅政務司司長林鄭月娥統籌、為期兩月嘅「全城清潔」運動九月尾結束，政府聲稱在「八個政策局及十九個政府部門」合作下，公共衞生情況大有改善。
然而，把清潔運動當做騷，而唔係持之以恒的經常清潔、監察全港各個衞生黑點，呢頭話清除幾多噸垃圾，滅咗若干蛇蟲鼠蟻，之不過，「全城清潔」一過去，老鼠又喺橫街窄巷搞派對，曱甴又喺渠邊牆隙四處尋幽探秘，咁樣嘅「全城清潔」，「家是香港」又有幾值得欣賞呢？
本報「探射燈」一射，「全城清潔」就露底。事隔個半月，本報記者重返全港多個衞生黑點，發現衞生情況絲毫無改善，其中深水埗及荃灣後巷，葵青區鄰近工業區的馬路旁，衞生情況極之惡劣！阿哥，港產官僚至叻自吹自擂，又最善於自欺欺人，一場所謂「全城清潔」可思過半矣！官僚最愛門面工程而唔做實事，香港有乜辦法唔沉淪下去啊！
講起門面工程，中國歷史上嘅隋煬帝楊廣就最叻，佢為咗粉飾太平、炫耀國力鼎盛，工程愈搞愈多，為了顯示物質文明，據講連那些收入微薄嘅菜販都要在店舖裏鋪上地氈，路旁嘅樹木都用絲綢纏起來，極盡奢華；有胡商不理解，問身邊嘅中原朋友：你哋這裏的人連衣服都穿不起，為甚麼不把這些裹在樹上的絲綢拿去給他們穿呢？
胡商的話，不無諷刺之意味！然則如今香港嘅所謂「全城清潔」何嘗不是雷聲大雨點小，眾所周知，早於○三年由禍港七年嘅曾蔭權「擔大旗」任清潔大隊長，一樣係做騷吹水，大龍鳳完一輪，每次「清潔」完後垃圾如舊，鼠蟻如舊；去到今時今日，官到無求膽生毛嘅林鄭，依然玩呢味嘢，可惜，只贏得「看上去很美，讀起來真糟」；「全城清潔」根本名不副實，搞清潔，唔通半山及高尚住宅都要敲鑼打鼓叫人日日清理垃圾咩！