海洋公園日前公布業績，將入場遊客下跌歸咎佔領行動（佔中）影響，但英國喜迎四年來最抵食嘅聖誕大餐，仲話要多謝佔中，認真估你唔到。莫非真係如外界所講，有外國勢力操控佔中而從中得益？如果係真，咁就要多謝佔中發起人之一嘅戴耀廷喇！
英國有報道話，今年英國家庭平均可以慳百分之一嘅價錢去享用聖誕大餐，因為當地農民要下調農產品價格去維持競爭力咁話。報道解釋話，當地家庭可以咁開心過節，多得俄羅斯總統普京回應歐盟制裁，禁止歐盟農產品入口，仲要因為香港佔中等示威活動破壞咗香港經濟，搞到對英國農產品出口需求下降，影響到當地農民收入喎。
香港生意差咗就賴佔中，英國農民收入減少又賴佔中，但英國市民享用最抵食嘅聖誕大餐就多謝佔中，真係乜都可以關佔中事，難怪爭取連任區議員失敗都可以賴無打佔中牌喇，佔中呢個藉口真係好使好用。