政情：候任漁灣區議員無得「見」家人
今屆區議會選舉有多名「傘兵」成功跑出，其中以成功挑戰政壇老將嘅候任東區漁灣區議員徐子見，就話當選後開始忙到甩轆。原本佢從事貿易生意，為咗履行當初承諾，會辭職成為全職區議員，依家開始籌組班底及搵地方租辦事處。面對每日忙碌工作，徐子見話已經好耐無見過家人，晚晚返到屋企，太太同囝囝都瞓晒，但就話無後悔過參選，家人都好支持佢，將來希望做好區議會工作。
年初骨折 仲要用拐杖
四十八歲嘅徐子見認為，「傘兵」呢個稱號應該係講緊一眾後生仔，但佢就話自己都係佔領行動之後先接觸政治，繼而決定參選，掹車邊都算係「傘兵」喎。佢又透露喺佔領行動之前，並無參與過政治，甚至討厭政治，覺得都係「咪搞我啦」，但最終都決定參選。區選期間，徐子見經常帶埋拐杖落區，原來佢喺農曆新年踩單車時不慎跌傷腳骨折，要做鑲鋼板手術，後來傷患發炎要再做手術，至今仲要做物理治療，但對日常生活未有太大影響。