政情：苦盡未甘來 創科焗搬竇

工作排山倒海湧到

現屆政府原訂喺二○一二年開設創科局，原來當時政府已經留咗政總總部二十樓畀創科局做辦公室。點之一開始就遇到立法會「拉布」，一拉就三年半，香港寸金尺土，政府無理由好似空置校舍咁丟空寫字樓，於是用嚟做創新科技署及政府資訊科技總監辦公室。如今創科局「出世」，搬番二十樓統領大局，可說係順理成章，但二十樓暫時未有空間，所以要裝修「執一執位」，明年中先搬到落去。

創科局認真係「奔波命」，唔單止要搬竇，工作亦排山倒海湧到，之前商務及經濟發展局局長蘇錦樑已經暗示，創意香港及知識產權署稍後亦可能撥歸創科局，原來發展局推行嘅九龍東「聰明城市」，都可能會過畀創科局處理。

有知情人士指，現時由發展局負責將九龍東作為「聰明城市」嘅試點，但係軟件硬件都涉及唔少技術考慮，發展局未必識得處理，所以好可能交由創科局負責。此外，楊偉雄上任時講過，會研究推動以創新科技服務長者及弱勢社群等，預計呢啲政策亦可能要同食物及衞生局、勞工及福利局合作，睇嚟創科局要不斷接手其他政策局有關高科技嘅項目。

至於楊偉雄上任時提到，希望建設香港成為連通的WiFi城市，據了解，顧慮到由政府起基建成本太高，加上科技日新月異，如果經常更新，涉及好多資源，又未必追得切，局方主張唔會自己起WiFi基建，反而會以類似招標方式，租用現時電訊業界嘅WiFi設施，相信可以更快提高政府免費WiFi覆蓋率，為業界提供商機之餘，相對亦平得多。