中環出更：立會午宴 長毛例牌示威被逐
立法會尋日宴請特首、行政會議成員及政府官員，本地立法、行政代表難得趁立法會復會後聚首一堂，建制、泛民都搭晒膊頭好好傾。不過，社民連梁國雄（長毛）作為少數出席嘅泛民議員，都要例牌入場向特首梁振英遞信抗議，結果梗係被保安驅逐離場啦，但留低紙板鐘及鹹魚肉餅飯喺宴會廳，代表爭取全民退休保障及標準工時。
另一惹火人物仲有行政會議成員李國章，日前再有懷疑係港大校委會閉門會議嘅錄音聲帶流出，佢揚言可以經民事同刑事控告衝擊會場嘅學生，李國章冇確認錄音內容，只係話香港係法治地方，無論係咪學生，犯咗法都要負責任，但佢冇回應究竟學生犯咗咩法。被問到係咪適合做港大校委會主席，李國章更笑言「我諗你要問（教育界立法會議員）葉建源！」皆因葉建源號召港大畢業生周日出席特別大會，討論包括李國章唔適合出任校委會主席等議案。
葉劉又再「篡改歷史」
至於新民黨葉劉淑儀就同政務司司長林鄭月娥相當好傾，葉劉事後透露，有外國商會前主席話佢知，香港日佔時期有外國人被拘禁喺集中營，希望趁明年來港紀念呢段日子，唔知政府會唔會配合，搞個紀念儀式。不過，葉劉似乎對「篡改歷史」有鋪癮，繼年初喺社交網站搞錯中華人民共和國嘅建國年份，尋日又話下年係紀念香港重光「四十五周年」，實情下年已經係香港重光七十一周年，睇嚟葉劉真係要惡補吓歷史喇。
食物及衞生局局長高永文就有特別任務，食飯都要四圍向議員推介注射流感疫苗，下周三仲會派人為議員打針添！不過，議員單仲偕（先刀雞）同何秀蘭（Cyd）都率先說不，其中（先刀雞）自言兩年前先病過一次，冇病冇痛冇興趣打。Cyd就崇尚自然療法，認為有病應該靠自身抵抗力擊退病菌。聽講議員劉慧卿有興趣打針，但就講明要畀番針錢，均真啲好。
卓妮