俗語話，欲無後悔先修己，各有前因莫羨人。意思好簡單，凡事都有前因後果，如果自己唔努力，一味羨慕人哋，盞得個恨字咋。好似澳門政府年年派錢咁吖，香港政府根本冇得比，一個疏爽，一個孤寒，相形見絀，高下立判，港人羨慕都冇用。
同往年一樣，澳門政府新一年度施政報告繼續貫徹大手筆作風，除咗維持向每名永久性居民派九千元現金，非永久性居民派五千四百元，仲向每個公積金帳戶額外注入七千元；至於敬老金、殘疾津貼嘅金額亦齊齊增加，可以講係雨露均霑，皆大歡喜。
即係咁，澳門派錢早就係意料中事，本來唔值得大驚小怪，最估唔到嘅係，近年博彩業收入下降，政府財政盈餘減少，而惠民措施冇減少不特止，仲繼續加碼，唔到你唔服。正所謂，取之於民，用之於民，呢啲咪就係還富於民囉。反觀香港政府一毛不拔，就算庫房水浸亦寧願做守財奴，連派粒糖都不情不願，簡直不知所謂。
講起真係唏噓，以前香港樣樣都比澳門優勝，點知回歸後此消彼長，依家樣樣都落後過人。舉個例吖，澳門人均GDP已經達到九萬幾美元，全球排名第四，以購買力平價計算，仲係排名全球第一添；而香港人均GDP咁多年來幾乎原地踏步，舊年只有四萬美元左右，唔及澳門一半，你話醜唔醜怪吖？香港年年睇住澳門派錢，唔係冇原因（口架）。
當然喇，爛船仲有三斤釘，香港家底雄厚，坐擁龐大儲備，港府唔係冇能力派錢，只係孤寒成性，唔肯承擔啫。唔使講咁多，淨係全民退休保障制度一拖再拖，就知道港產官僚幾咁無良。香港安老政策天殘地缺，本來已經問題多多，加上人口日益老化，更係危機重重。社會各界對全民退保早就有共識，舊年學者團隊亦已向港府提交研究報告，建議實行全民老年金，點知當局拖拖拉拉，年底至話推出諮詢，而且以「不論貧富」及「有經濟需要」，取代「全民」及「非全民」，擺明有傾向性，企圖誤導公眾，搞到連學者都睇唔過眼，怒斥當局假諮詢。
講多無謂，食多會滯，最近有百幾位學者聯署要求推行全民養老金，希望做到全民性及基本保障，並促請將此方案納入退休保障公眾諮詢文件。嗱，呢啲咪就係市民嘅心聲囉，當局聽到未吖？話時話，港府目前正就新一年度施政報告及財政預算案諮詢公眾，好似想廣納民意咁，其實係人都知呢啲根本就係做戲，好簡單，多數民意要求還富於民，港府做唔做得到呢？