政情：陳智思被「扑」 避談嶺大風波
嶺南大學尋日舉行學位頒授典禮，一共頒發予一千多名畢業生，當中包括三個榮譽博士，分別係嶺大校董會前主席陳智思、工業家鍾志平及諾貝爾獎得主赫克曼。不過，頒博士明明係開心事，點解佢哋唔敢同人分享呢？
膺榮譽博士 合照後速閃
近日傳出校董李以力經營嘅書院協助學生提早畢業，仲爆出協理副校長兼總務長夏迪星涉嫌剽竊論文，醜聞遠播。可能呢兩個「炸彈」太難拆，所以陳智思同鍾志平影完大合照就極速離開，對近日風波作出零回應。
陳智思等三位新任榮譽博士由校董會主席歐陽伯權「扑頭」頒發，陳智思仲做埋代表講致謝詞，佢謙稱自己喺三人之中，學歷最淺一位添。不過，佢喺典禮後就無評論任何事，明明佢喺致謝時話獲頒博士後就成為「嶺南」一分子，會盡力支持嶺大同負責任，莫非要到有關醜聞圓滿解決後，佢先能夠開腔做真正嘅「嶺南人」？