政情：周伯展護眼妙計可「借鏡」
唔少港人每日長時間對住電腦工作而苦無護眼對策，導致雙眼疲勞。望得耐電腦屏幕，間中要望吓啲遠景係人都識講，但香港寸金尺土，喺辦公室唔係坐正窗口位嘅話，想搵個遠景望吓都難。對此本身係眼科醫生嘅睛彩慈善基金創會會長周伯展就有妙計，即使公司範圍太細，一樣可以拉長視線範圍。
利用反射望20呎外景物
周伯展教路，要記住「二十．二十．二十」呢個秘訣，即係每對住電腦屏幕工作二十分鐘，雙眼就要休息二十秒，望二十呎以外嘅景物。如果辦公室望唔到二十呎以外咁遠，佢就話可以喺枱上擺放一塊鏡，利用塊鏡反射坐位背後嘅景物，咁距離就至少遠咗一倍，再唔係簡單閉上眼睛一樣可以放鬆眼部肌肉。
佢仲話，好多港人唔知道小孩有弱視，可以喺八歲前嘗試透過訓練大腦來矯正，皆因八歲前係眼部發育黃金時期，但錯過咗就未必做到喇，建議小孩兩歲半就要進行眼科檢查，無論青光眼定斜視等都可以及早發現。