政情：發叔妹夫 火併張學明
新界鄉議局去年初撥款一百萬元成立研究中心。據了解，過去二十個月已耗盡二百多萬元經費，於是喺尋日嘅鄉議局執委會上，提出一項追加一百萬元撥款嘅臨時動議。會上有執委要求中心清楚交代帳目，連平日作風低調嘅鄉議局副主席張學明，亦明言花錢做出來嘅研究要言之有物，又反問係咪將平日嘅會議紀錄「搬上去」就可成書，言論激嬲鄉議局前主席劉皇發（發叔）妹夫兼研究中心主任薛浩然，雙方一度舌戰「駁火」！
張三度自稱「老細」
薛浩然認為，張學明嘅講法侮辱咗做學問嘅人，又舉例指今年初出版嘅《劉皇發言論集》，係後世研究新界史不可或缺嘅部分，而非為咗「擦老細鞋」。之後佢愈講愈勞氣，話「唔鍾意咪炒咗佢唔做，慳番啲錢」，又批評對方唔聽意見。張學明回應時話，如果薛係以中心主任嘅身份喺執委會上表達意見，佢唔會聽；又指無清楚指示中心工作，係佢作為「老細」嘅責任，說話之中三次強調自己係「老細」身份。
張學明續指，鄉議局撥出三百萬元，研究中心於年半以來出版六本書，內容以寫實、紀要居多，佢從旁聽到好多想法，認為探討小型屋宇政策先係重中之重。雖然張學明多次強調並非指薛浩然辦事不力，只係希望大家清楚研究中心如何使用經費，但言下之意好明顯係指研究中心使錢物非所值，而出版嘅書籍及報告並非太實用。
劉業強期間無出聲
薛浩然與張學明單係喺呢個議題上，已經爭拗咗數分鐘，後來錦田鄉事委員會主席鄧賀年亦加入戰團，建議研究中心可以多寫一啲對鄉議局有利嘅議題，例如係郊野公園及綠化地帶等研究，又認同執委對研究中心嘅指示應該清楚一點。反觀鄉議局主席劉業強喺台上一直無出聲，直至臨尾先叫大家提出意見時應該保持平心靜氣。如果喺醫院留醫嘅發叔得知此事，唔知會有咩感受呢？