周五成立嘅創新及科技局局長人選仲未揭曉，但未見其人就先見撥款申請。政府尋日向立法會財務委員會提交文件，指創新科技署建議從創新科技基金額外撥出約六億七千七百萬元，支持基金轄下嘅四所研發中心，喺一七年三月營運期結束後再延長四年至二○二一年。財委會已應政府要求喺後日加開會議審議撥款申請，到時新上任嘅創科局局長分分鐘親自上陣。
呢項撥款申請可以話係創科局頭炮工作，相信當局會好着緊。但財委會因為早前激進派議員就政府成立創科局而「拉布」，令到唔少議程積壓。
而近日立法會工務小組委員會又通過將觀塘駿業街遊樂場活化為觀塘工業文化公園，政府已就有關項目要求財委會主席陳健波喺後日嘅財委會會議後加開多一節會議。陳健波唔只應政府要求後日加會，仲決定喺下周五加開「應急會議」添。
不過，財委會要先處理工業文化公園嘅撥款申請，以及人事編制小組委員會已通過嘅多個政府部門嘅開設職位申請，之後先審議創科局有關四個研發中心嘅撥款，莫非創科局局長新官上任就要去立法會「罰坐」？
卓妮