中環出更：御釀葡萄酒 格外甜心頭
皇室釀製嘅美酒，平民實在難有機會享用，但格魯吉亞皇室竟然出售皇室御釀葡萄酒，該國王子Juan Bagration Mukhraneli日前專程到訪香港，為「格魯吉亞美酒節二○一五」作路演宣傳，卓妮當然把握機會一睹皇室風采啦！今次係王子首次訪港，會喺香港停留十日再轉訪北京。
王子已經諗好要食盡香港美食及體驗本地文化，仲話要拜會以前讀書認識、多年無見嘅朋友。佢仲打算四圍觀光，但因啱啱到埗未知邊度值得去，仲反問卓妮有乜好提議添。
一飲想妻 葉澍堃賣口乖
王子透露，格魯吉亞人已經當飲酒為生活一部分，係當地一大文化，大部分家庭更會自行釀酒，所以每家每戶都算係有其獨門釀酒秘方。王子話，格魯吉亞嘅釀酒技術已有逾八千年歷史，現時只有摘葡萄會用上機器，其餘釀酒工序仍然採用傳統方法，難怪成為非物質文化遺產喇！
經濟發展及勞工局前局長葉澍堃（Stephen）亦獲邀試飲御釀葡萄酒，佢笑稱坐喺王子隔籬，已經覺得自己似王子。Stephen之後試飲半甜酒時，又話隻酒甜在心頭，令佢諗起太太，認真識把握機會氹老婆。酒評家梁淑意去年專誠去格魯吉亞參觀當地酒莊，認為當地酒口味特別，部分酒能夠配合中菜，確係一個新嘗試。
附王子認證 港全球首賣
今次推出三款御釀葡萄酒，每款限量四千瓶，更附有王子親筆簽署嘅號碼證書添！香港係全球首個發售城市，王子話香港係酒類產品重要市場，而且旅遊及零售業都蓬勃，所以就喺香港打頭炮，真係識貨。
卓妮