「葉公好龍」嘅故事，大家一定耳熟能詳。平機會平時滿口公平正義，扮晒為民請命咁款，點知真係有市民求助時，就縮都縮唔切，連影都冇埋，呢啲咪就係典型嘅葉公好龍囉！
話說有位女文員懷孕期間被公司不合理針對，企圖逼佢辭職，於是向平機會求助，對方居然以佢冇被解僱為由拒絕受理。最頂癮嘅係，女文員其後向其他民間團體求助，入稟法院控告任職公司懷孕歧視，連法官都建議平機會協助調停，點知平機會仲係耍手擰頭，話唔方便介入喎。結果女文員同公司庭外和解，僱主賠償二萬元並致道歉信，你話平機會係咪食塞米吖！
咁都未算最離譜，據事主講，平機會舊年八月收到投訴，一直拖到今年一月至話唔受理，唔幫手都算嘞，連入稟後有咩程序都一問三不知，淨係叫佢問番法庭，直情推得就推，卸得就卸。據佢所知，類似咁樣被耍走嘅懷孕歧視個案仲有好多，正考慮投訴平機會喎。
鬼咩，平機會主席周一嶽有名畀你叫「廢嶽」，旨意佢幫市民主持公道，慳番啖氣暖肚好過喇。係人都知，平機會好多時接到投訴後就闊佬懶理，關人個關，搞到每年被分類為終止調查嘅個案高企。即使市民咁好彩，投訴獲平機會受理，之後亦只可以透過書信同平機會溝通，想見調查人員一面，仲難過登天。平機會當市民透明，唔怪得支持度喺六大法定機構中包尾喇。
再講前平機會僱員束健銘嗰單案吖，呢位仁兄就係廢嶽不務正業，打擊異己嘅犧牲品嘞。廢嶽之前建議就異性及同性「事實婚姻」立法，束健銘被指動員教友去信平機會提反對意見，結果不獲續約兼冇埋約滿酬金，實行變相炒魷，束健銘入稟討公道，最終獲判勝訴，平機會發還八十多萬元約滿酬金、輸埋訟費之餘，仲畀法官狠批侵犯員工言論自由，紀律調查有欠公平，堂堂公營機構淪為無良僱主，真係乜嘢架都畀廢嶽丟清光。
呢啲咪應做嘅唔做，唔應該做嘅亂做囉。大家有眼見，廢嶽掌舵嘅平機會不務正業，無事生非，添煩添亂，早就有口皆「悲」，仲要當公帑係提款機，唔係要錢要人就係計劃搬竇去豪華寫字樓。佢老哥出年夠鐘走人，計功夫茶話齋，不獲續約兼冇埋約滿酬金嘅應該係佢就真。
始終都係古人講得啱︰德不稱其任，其禍必酷；能不稱其位，其殃必大。港府有眼無珠，對好似廢嶽一類無德無能嘅舊電池情有獨鍾，施政有乜法子唔甩漏多多，搞到民怨沸騰吖！