政情：錢大康封口免中「地雷」
近排大學風波一浪接一浪，繼港大校委會副校遴選風波後，政府委任多名嶺南大學新任校董亦爆出爭議，曾為港大首席副校長、九月履新浸大校長嘅錢大康，尋日出席校長就職典禮並頒授榮譽博士學位予四位不同界別人士，不過除咗於典禮上致詞，錢大康對其他院校嘅爭議課題都避而不談，未有作出任何評論，莫非係怕講多錯多？
講番錢大康於典禮上嘅致詞，佢表示對於獲委任為浸大第五任校長感到榮幸，適逢明年係浸大六十周年校慶，能夠於此時開始自己喺浸大嘅日子，實在感到與有榮焉，佢希望未來可與一眾學生及教職員推動大學發展，又鼓勵各畢業生要高瞻遠矚、放眼世界、進行長遠規劃，坦言與世界接軌是提升競爭力的關鍵。