甩漏不盡嘅香港郵政被政界中人踢爆又「甩轆」！有建制派議員尋日於立法會一個事務委員會上爆料，指接獲有候選人投訴，於寄出免付郵資郵件時，因為郵件內容有多張同其他人嘅合照，被郵政職員要求證明合照人士同意支持該名候選人。
議員就質疑郵政署點可以做埋選舉主任嘅工作，有人更批評，郵政至今仍未就今次事件道歉，此事變相為選舉事務處工作「倒米」。
有民建聯中人透露，該黨上月底寄郵件時，被郵政職員要求出示支持同意書嘅副本，或要候選人簽署聲明書，佢哋基於有關條例未有相關規定，因此向選舉事務處投訴，處方表明會通知郵政唔使咁做。
及至本月初，民記再寄出同類郵件時，郵政職員仍然要求要先簽聲明書，佢哋只好再向選舉事務處投訴，據引述處方話擔心郵政高層知道呢個情況，但前線人員仍然唔掌握，會再通知郵政，事後幾經波折才能寄出郵件。
選舉事務處總選舉事務主任李柏康回應指，經了解事件後相信，涉事職員有少許誤解同太熱心，形容為一番好意提醒，當局已同有關職員溝通，相信已解決事件。
卓妮