中環出更：香江暖流 帶挈電器銷情
本港零售市道前景暗淡，化妝品等銷售額都錄得下跌，不過部分貨品仍然持續好賣，卓妮早前去到喺賽馬日舉行嘅「樂聲盃」，撞到代理日本電器起家嘅信興集團主席蒙德揚（David）話，個別產品銷售情況仍然唔錯，例如風扇同冷氣機。香港早排先經歷七年來最熱嘅立冬，估唔到天氣熱，都可以對售賣電器嘅公司帶來希望。
卓妮日前喺沙田馬場遇到David，講起零售業市道，佢話雖然零售業近來冇咩增長，不過都有個別電器產品例外，好似冷氣機、風扇等，銷售額就一路都幾好，估計可能係同天氣熱有關。現場所見，David呢排好似清減咗，佢話因為要準備跑馬拉松，所以減緊磅，最近先瘦咗兩公斤。
姚珏魯恭「樂」教兩女
同場仲有著名小提琴家姚珏同佢丈夫魯恭，原來姚珏兩名女兒已經亭亭玉立，仲遺傳咗媽媽嘅音樂天分，小提琴同鋼琴都已達到演奏級。不過，姚珏話自己只係教兩名女兒至初階程度，佢哋十幾歲時就冇親自教喇，自言太過嚴格，平時教自己學生都好惡，所以唔教女兒，費事嗌交，不過女兒喺演出前都會請教，佢當然唔會吝嗇。另一方面，原來魯恭以前都有唱開歌劇，不過姚珏就話對方怕醜，只會唱畀自己聽喎。
本月初卸任香港大學校務委員會主席、人稱「金刀梁」嘅梁智鴻，當日聯同港大醫學院教授盧寵茂齊齊入馬場，現場所見金刀梁精神奕奕、笑容滿面，唔知係咪因為唔使再處理港大事務，所以成身都鬆晒呢？
卓妮