一不離二，二不離三，本港大型基建工程問題多多，烏龍百出，幾乎無一倖免。呢，今次又輪到港鐵沙中線有危機喇！
係咁嘅，路政署證實接獲港鐵報告，承建沙中線鑽石山站擴建工程項目聯營公司內嘅新加坡公司，傳出財政困難，港鐵正跟進事件，路政署已要求港鐵密切注意事態發展，以防工程爛尾咁話。而運輸及房屋局局長張炳良尋日更大派定心丸，強調合約規定聯營公司其中一方出問題，另一方有責任履行合約，又話根據港鐵嘅報告，目前工程一切正常喎。
正所謂，不怕一萬，最怕萬一，港府高官大安旨意，實際係咪咁，仲要睇過至知。據新加坡傳媒報道，呢間公司喺當地嘅公營房屋工程，已經因為財務問題而停工，搞到要重新招標。既然新加坡嗰邊唔掂，該公司負責嘅沙中線工程睇怕都幾難唔受影響。正如立法會議員質疑，大拿拿十幾億元工程，如果一間公司搞得掂，當初又使乜多此一舉成立聯營公司呢？
至於話港鐵拍心口保證工程進度正常，更加信唔過。大家有眼見，高鐵工程大滯後，港鐵瞞得就瞞，瞞唔到就賴，高鐵到底超支幾多，幾時通車，依家仲係未知之數。張炳良聲稱港府會同港鐵商討點樣處理延誤同超支問題，希望短期內向公眾交代喎，講咗等於冇講。咪畀人睇死，呢筆糊塗帳最終都係打死狗講價，由納稅人埋單嘅咋。仲有吖，最近傳出高鐵工程備用資金面臨乾塘危機，多間承建商正醞釀集體跳船，如果真係咁，高鐵隨時爛尾都似。
講番沙中線，呢條全長十七公里嘅鐵路都可算係一波三折咯。先係土瓜灣工地發現古蹟，導致通車日期延後一年，之後又因為灣仔北海面掘出大型金屬物，令填海工程受阻。唔使問阿貴，工程一延再延，造價自然水漲船高，由○七年估計嘅三百八十多億元，大幅飆升至一二年嘅近八百億元，最近港鐵估算又話要加碼十三億元，加上承建商遇到財困，分分鐘又阻多兩阻，造價仲有排升吖。
當然喇，基建工程延誤超支成為家常便飯，又點止沙中線同高鐵吖，港珠澳大橋及西九文化區同樣淪為財政黑洞，都唔知點收科。特別係港珠澳大橋，珠海段順順利利，澳門段問題亦唔大，唯獨香港段阻滯重重，落成遙遙無期。自己衰就好喇，仲要累埋街坊，你話係咪佗衰家吖。
咪話功夫茶唔提醒吖，沙中線承建商出事，影響可大可小，最怕工程拖得兩拖，演變成高鐵翻版，咁就大件事嘞。港府大安旨意，闊佬懶理，遲早又搞到無法收拾咋。