東方報業集團踢爆港鐵沙中線其中一個聯營承建商出現財政困難，隨時會影響工程進度，運輸及房屋局局長張炳良尋日回應事件時，死撐有關工程正如常進行，未見異樣。佢又強調港鐵另外兩條新鐵路線，即南港島線東段同觀塘延線，分別已完工九成幾同九成，預計可於明年底及明年第三第四季通車。港府近年多項大型鐵路同運輸工程，包括高鐵、沙中線同港珠澳大橋等，落成日期都係一再押後、一拖再拖，好難令市民相信兩條新路線真係可以如期竣工通車！
