政情：壓力大 謝偉俊變雪糕狂
甜食係好多人嘅至愛，但攝取過多糖分就好容易引致肥胖以至糖尿病。立法會議員謝偉俊（Paul）尋日出席一個無糖體驗活動時透露，佢從來都唔會喺飲品落糖，而且一飲甜嘢就會喉嚨痕同唔舒服。不過，佢話唯一戒唔到嘅就係雪糕，壓力大嘅時候，可以一次過食晒一公升雪糕，去到外國見到好味嘅軟雪糕都會忍唔住買嚟食，認真瘋狂。
無糖飲食 由「美」啟發
講番今次活動，本身係糖尿病患者嘅無糖天使創辦人余雁薇話，過往去美國旅行時發現，當地酒店自助餐最少有三至五款無糖食品，呢次旅程令佢構思推廣無糖飲食，希望推廣至香港餐飲業。為此佢聯絡咗香港一百五十間酒店，可惜最終只有一間願意參加，仲喺一個月後收回無糖食品，呢次經驗令佢非常氣餒。直至去年，佢決定重啟推廣無糖飲食嘅計劃，希望藉此引起社會對全港近七十萬名糖尿病患者嘅關注，同時推廣健康飲食習慣。