政情：激辯議會抗爭 科大拗贏城大 反拉布有理
近年立法會興起嘅「拉布」文化，支持者辯稱係抗爭手法，反對者就批評浪費公帑、阻住地球轉。尋日一場大專生普通話辯論賽總決賽中，代表正方嘅城市大學硬碰反方科技大學，就議會抗爭文化是否有利港人參與政治展開激辯，結果由「反拉布」嘅科大獲勝，似乎暗喻「拉布」嘅主張站不住腳。希望社民連梁國雄等拉布議員聽吓班勝出嘅學生講，反思吓自己嘅行為喇！
支持拉布嘅正方認為，抗爭文化能夠將政治矛盾鮮明化，亦會吸引媒體作更全面報道，有助公眾了解議題。佢哋更指出，功能組別同埋分組點票係議會制度不公平嘅表現，所以抗爭係無奈嘅選擇，目的係凸顯議會制度嘅不公，最終有助於令制度更民主及健康。正方又以反高鐵及反東北發展為例，證明拉布能夠號召市民包圍立法會，上屆立法會選舉嘅選民人數同投票率都上升，都係歸功於議會抗爭咁話。
拉布擾民 犧牲大於得益
反方就反駁指，喺一啲具爭議性嘅議題方面，唔使拉布都可以搞抗爭，正如反國教事件，無拉布依然吸引過十萬名市民集會，足以證明港人參與政治同抗爭文化無關。上屆選民人數增加係反映香港整體人口增加，選民比例並無大改變，唔能夠話港人嘅政治參與度高咗。
反方進一步反擊話，議會內嘅抗爭會令議會形象低落，阻礙議會流程，令其他議員發言機會減少，而且民調結果顯示市民對拉布反感。不過佢哋都同意，拉布或會帶來好處，但所造成嘅犧牲遠大過得益。
11院校參與 普通話應戰
今次比賽總共有十一間院校參與，每隊派出四位成員，其中必須有一位成員為本地學生，希望推廣普通話辯論風氣。尋日晉級總決賽嘅兩間學校學生各有幾十位同學到場支持，比賽前互叫口號為學校代表打氣，氣氛都幾熱鬧。
講開又講，立法會主席曾鈺成係辯論比賽評判之一，今次議題咁具爭議，佢亦成為剪唔剪布嘅政治磨心，今次反拉布一方獲勝，唔知係咪代表佢嘅心聲呢？