中環出更：嶺大首位博士畢業生 李國麟：堅o架
由嶺南大學校董李以力擔任校長嘅國力書院，被指涉嫌協助學生提早取得外國大學學位，事件震驚全城。本身喺大學教書嘅衞生服務界立法會議員李國麟（Joseph），原來係嶺大首名博士畢業生。○三年畢業取得嶺大社會科學哲學博士嘅佢話，自己所持嘅真係博士學位，仲笑言「除非嶺大係流」。不過Joseph都留意到，香港過去幾年出現「泛學位化」現象，好多合辦課程湧現，甚至網上有假證書出售，僱主請人時都防不勝防。
促增監管合辦課程
嶺大近日發生連串風波，包括已經請辭嘅協理副校長兼總務長夏迪星涉嫌剽竊等，Joseph直言覺得驚訝同失望。不過佢就話，留意到近年社會出現泛學位化現象，包括合辦課程湧現，最離譜係上網都可以買到假證書，令到獲取學位變成一件好容易嘅事。當局真係要加強監管呢類非本地院校開辦嘅課程先得。
Joseph又提醒大家，報讀呢啲合辦課程時應考慮清楚院校嘅排名、學術地位同課程質素等，而僱主請人都要小心，要留意吓應徵者所持嘅學位係點拎番嚟。至於佢所屬嘅護理界別雖然都好多合辦課程，但有關院校都會派人嚟香港教授課程，所以於過去廿年都未聽過用錢買學位嘅情況喎。
卓妮