中環出更：能文能武 戰勝極地
講起律師，通常予人感覺每日坐喺辦公室工作，生活離唔開「石屎森林」，但其實香港嘅律師都有好動一面。香港律師會同廣東省、澳門及台北當地嘅律師公會，每隔兩、三年都合辦運動會，畀兩岸四地律師喺運動場上一較高下。今年移師香港體育學院舉行，尋日舉行開幕禮時，唔少「實力派」律師雲集，其中翟氏律師行創辦人翟文禮（Raymond）就係人辦。
上月Raymond同香港截肢者協會（協會）副主席馮錦雄夫婦，三人五足遠赴智利阿塔卡馬沙漠，參加全球四大沙漠賽事之一嘅極地馬拉松，佢哋要喺七日內完成二百五十公里行程，期間要自備糧水、食壓縮及脫咗水嘅「太空餐」，仲要面對每日高達五十度嘅溫差，條件咁惡劣，但係佢哋不但完成賽事，仲贏得團體賽冠軍，為協會籌得十幾萬元經費，馮錦雄更係全球第一個完成同類馬拉松嘅截肢者添！
律政群英 運動場較勁
香港律師會前主席周永健都有到場，佢透露廿幾年前已經開始做運動保持身形，每星期會抽三日時間健身，唔怪得佢平日為慈善籌款獻唱，中氣十足啦！
同場嘅律政司司長袁國強被問到平時做開咩運動，佢居然笑言「瞓覺算唔算？」查實佢平日最多行出官邸外面兜個圈。雖然佢尋日冇落場露兩手，但就對現場嘅小朋友好有興趣，不但主動撩佢哋傾偈，仲細心照顧佢哋，一副慈父面口。作為官場著名嘅「鑽石王老五」，唔知佢幾時有興趣生番個呢？
卓妮