有句潮語係咁講嘅，唔怕神一樣嘅對手，最怕豬一樣嘅隊友。真係一啲都冇講錯，好似港珠澳大橋咁吖，珠海段一切順利，澳門段問題亦唔大，唯獨香港段一波三折，阻滯多多，都唔知幾時至完工。「東方報業民意調查」顯示，大部分受訪者批評港府監察不力，拖累大橋跨境效益，隨時累己累人。
講起港珠澳大橋，真係一匹布咁長。呢條跨境大橋前後研究咗十幾年，幾經辛苦至拍板興建，點知好事多磨，香港呢邊烏龍百出，先係遇到司法覆核挑戰，繼而出現口岸人工島飄移，加上接連發生致命工業意外，結果一阻再阻，一延再延，原定一六年通車嘅目標注定化為泡影。
正所謂，唔怕唔識貨，最怕貨比貨。同樣係呢條橋，珠海方面順順利利，保證可以如期完工；澳門方面雖然遇到工程技術問題，但一早有後備應急方案，預計唔會影響進度。好明顯，大橋唔可以如期通車，問題主要出喺香港呢邊，堂堂國家級工程被香港搞成咁，你話係咪佗衰家吖。
兵法都有講喇，兵之情主速。港府築室道謀，拖拖拉拉，唔怪得咁多年來一事無成。當年香港係全球第一貨櫃港，物流業興旺，如果把握時機，及早興建大橋，競爭力就唔會跌跌不休喇。家陣香港物流業風光不再，貨櫃吞吐量由全球第一淪落到第五，港珠澳大橋姍姍來遲，等得嚟都成為明日黃花咯。難為港府口口聲聲要打造橋頭經濟，簡直吹水唔抹嘴。
正如「東方報業民意調查」顯示，多數受訪者認為香港段通車無期，無法把握經濟機遇，拖累跨境效益；亦有唔少受訪者認為會影響民生，連帶原有客源一併流失。
話時話，港珠澳大橋通車無期，唔止可能流失客源，影響經濟效益，而且隨時淪為爛攤子添吖。大家都知，近年本港大型基建延誤超支已成為常態，除咗港珠澳大橋，廣深港高鐵、西九文化區等等，淪為一個個財政黑洞，就算港府坐擁金山銀山，呢度浪費幾十億，嗰度超支幾百億，都遲早坐食山崩喇。好多市民反對興建機場第三條跑道，咪就係擔心成為另一個大白象囉。
曾幾何時，香港基建以高速度、高效率見稱，成為內地城市爭相學習嘅榜樣，點知依家淪落到樣樣不如人，連興建一條大橋都甩甩漏漏，烏龍百出，諗落都幾可悲。多數受訪者認為大型基建延誤超支氾濫成災，反映香港喪失競爭力，唔係冇理由（口架），再咁落去，香港遲早被邊緣化，連二、三線城市都做唔成吖！