嶺南大學校董會早前喺開會嘅時候被學生圍堵，校長鄭國漢尋日同太太孖住出席活動時，首次就圍堵事件開腔回應。鄭國漢就話，佢唔太認同學生圍堵校董會，希望學生用和平手段及理性方式去表達意見。問到佢會唔會考慮下次倣效香港大學校務委員會咁，轉地方開校董會，以免再出現學生衝擊會議嘅情況，佢就話校董會開會場地唔係佢話事，而係校董會秘書處去決定嘅。至於會唔會擔心下次開校董會再畀學生圍堵，佢就笑笑口話︰「希望唔會啦！」唔知鄭國漢會唔會希望愈大，失望愈大呢？
