政情：獲肥媽教路 葉劉依舊「無飯」
肥媽Maria Cordero主持嘅飲食節目深入民心。唔講唔知，原來肥媽除咗喺演藝界地位十足，同唔少政治人物都好有淵源，佢尋日就去到新民黨一個活動撐場。新民黨主席葉劉淑儀（葉太）就自爆，同肥媽十幾年前結緣於飲食節目，當年仲教佢煎（魚倉）魚。雖然簡單易做，不過就因為平日太忙，完全無時間學以致用，搞到依家仍然係「無飯主婦」。
靠囡囡做「米飯班主」
葉太雖然有肥媽過兩招，不過因為平日太忙，所以主要都係靠囡囡煮畀佢食。葉太仲透露，囡囡嘅拿手好菜有蘑菇湯、千層麵同中式扣肉。
同葉太相識十幾年嘅肥媽就大讚葉太係政界人才，葉太亦都話肥媽係靠自己向上流嘅好例子。雖然大家互笠高帽，不過問到葉太會唔會邀請肥媽入黨，葉太就話肥媽藝人身份，始終唔太方便喎。