政情：電郵「工」勢 炸小肥張
勞工政策一向係政府施政中嘅難題，之前標準工時委員會入面嘅六名勞方代表揚言，如果政府年底都唔就標準工時方案諮詢公眾，就集體退出抗議。政府都未來得及反應，勞方嘅行動已一步一步殺埋嚟。工聯會尋日就擺設街站，呼籲市民幫手爭取勞工假同公眾假劃一，仲疑似抄泛民橋，發起「一人一電郵」行動，叫市民將有關勞資問題嘅意見電郵畀勞工及福利局局長張建宗（小肥張），實行要「炸爆」小肥張個電郵收件匣咁話！
與特首會面將「追數」
勞工界同政府一直就取消強積金對沖、標準工時立法及勞工假同公眾假劃一等議題爭持不下。特首梁振英（CY）曾經形容勞工問題係「老、大、難」，連佢自己都好難講幾時可以就各勞工問題立法。工聯會立法會議員陳婉嫻已多次就勞工問題大膽同政府「駁火」，該會尋日更發起街頭運動，拎住幾個代表假期嘅相框去旺角同市民合照，呼籲市民幫手爭取勞工假同公眾假劃一，以免打工仔喺假期仍要工作，影響家庭和諧。
工聯會立法會議員麥美娟（Alice）尋日就話，該會會繼續用唔同方式爭取政府關注勞工議題。今日CY會就施政報告同佢哋見面，到時佢哋都會向CY追數。佢哋亦會擺街站同搞簽名行動，希望市民明白勞工權益對打工仔嘅影響。講到三年嚟咩都爭取唔到，Alice就話，其實佢哋十月中已經開始升級行動，就係呼籲打工仔將想法電郵畀小肥張，等政府知道市民對勞工問題幾着急。問到仲有冇進一步抗爭行動，佢就笑住反問「唔通你想我哋打交咩？」
料先處理假期問題
有勞工界人士指，現時勞資問題主要有取消強積金對沖、標準工時立法及勞工假同公眾假劃一三條戰線。勞工界希望CY任內至少可完成兩項。其中勞工假同公眾假劃一係相對較少爭議同容易處理，所以會由呢度入手，之後就係就標準工時立法。
工聯會依家已經開始用電郵逼小肥張表態，估計之後嘅抗爭力度只會有加冇減。工會同政府角力嘅好戲相信好快上演。