中環出更：美「艷」回首 熱鬧爭妍
尋日沙田馬場非常熱鬧，皆因尋日係莎莎婦女銀袋日，城中一班政商界名人均盛裝打扮出席，卓妮仲見到愛沙尼亞駐港名譽領事林建康同佢太太林黃寧艷（Lianne）。講起第一次穿着隆重嘅回憶，一向打扮優雅大方嘅Lianne就話，原來佢以前係名副其實「書蟲」一名，冇咩打扮，仲要有成千度深嘅大近視，只係後來做咗激光矯視先唔使再戴眼鏡咋！
Lianne坦言，學生時代最愛睇書，衣着方面反而好隨意，最鍾意就係牛仔褲襯冷衫，夠晒方便同舒適，就算係節日派對同舞會都唔會好似依家咁講究衣着，係後來出社會工作，佢先開始注重打扮。不過Lianne身形高挑，相信無論當年嘅文青定依家嘅高貴造型都難唔到佢啦。
大談穿衣之道
尋日嘉賓眾多，包括一向造型極花心思嘅九巴後人雷禮權及太太利蘊珍、「玩具大王」蔡志明太太蔡李惠莉同教育局前局長孫明揚（孫公）及太太鍾小芬等，位位都悉心打扮同配合主題帶返頂靚帽。主人家莎莎國際主席郭少明及太太郭羅桂珍就全程滿場飛招呼賓客。
香港中華廠商聯合會前副會長顏吳餘英話，以前唔係人人有機會讀大學，所以對佢嚟講，人生最隆重其事嘅一次並唔係着咩晚裝，反而係佢之前讀番書、終於有機會着畢業袍嗰一刻。而打扮走型格路線嘅鍾小芬就笑言，平日襯衫時孫公最鍾意話「着咩都冇所謂」、「最緊要快」，不過佢就一於好少理，堅持襯好先出街，仲會幫老公揀埋衫。好似今日佢就幫孫公喺西裝入面襯咗件粉藍色針織衫。至於蔡李惠莉就偏好紫色及紅色晚裝，覺得着起上嚟人都精神啲，唔似灰色咁會着到心情都灰埋咁話。
卓妮