古人話︰「治世以大德，不以小惠。」港產官僚啱啱相反，大事做唔到，惟有以小恩小惠敷衍民意，仲要大吹特吹，都唔知好笑定好嬲。
呢，勞工及福利局局長張建宗尋日發表網誌，話自一二年開始為長者及殘疾人士提供兩元乘車優惠，至今納入計劃嘅長者約有一百零七萬人，每日受惠嘅長者約八十萬人次，比三年前增加超過四成，政府今個財政年度向各公共交通營辦商發還嘅款額增至約九億元；佢仲話，家陣兩元乘車優惠已經涵蓋九成四綠色專線小巴路線，港府會盡快爭取更多路線加入計劃喎。
聽張建宗嘅語氣，長者出外探親、訪友甚至做義工，似乎統統拜兩元乘車優惠所賜，都咪話唔巴閉。
即係咁，乘車優惠減輕長者交通費負擔之餘，亦鼓勵佢哋多啲參加戶外活動，擴闊社交圈子，點講都係好事，問題係計劃實行超過三年，到依家仲未擴及所有公共交通工具，有咩值得沾沾自喜呢？好多地方嘅公共交通早就獲政府資助，受惠嘅唔止長者，所有市民都可以享受添吖。講到底，乘車優惠充其量只係聊勝於無嘅小恩小惠，根本唔值得大吹大擂。
係人都知，隨着本港人口持續老化，安老問題迫在眉睫，長者最需要嘅唔係乘車優惠，而係老有所養，老有所依。呢，來自全港十六間大專院校嘅六十多名學者，聯署提出「全民養老金」方案，建議六十五歲以上長者毋須資產審查，只要申請就可以每月領取三千五百元，所需款項由勞資雙方每月強積金供款中撥出一半，再加上政府提供一千億元種子基金，以及向大企業額外徵稅，預計基金到二○六四年仍會有盈餘。
冇錯嘞，安老人人有責，政府、個人、企業一人行一步，分擔責任，本來合情合理，而且有持續性，可以長期實行。可惜吖，港府善財難捨，冤枉甘心，早前承諾預留五百億元改善退休保障制度，已經牙痛咁聲，最近仲喺諮詢文件大玩文字遊戲，用「不論貧富」取代全民退保，誤導公眾，擺明想推卸全民退保嘅責任。大家有眼見，今時今日老人問題多多，例如長者資助宿位長期供不應求，港府唔諗辦法增加供應，反而一味諗縮數，一時提倡居家安老，一時鼓勵北上養老，等於將照顧長者嘅責任推畀市民，港產官僚涼薄成性，旨意佢哋承擔安老責任，盞嘥氣嘅咋。
始終都係嗰句，官僚靠得住，豬乸會上樹。港府視長者如包袱，將兩元乘車優惠視為天大恩惠，簡直貽笑大方。