政情：蔡海偉外遊 不忘「廁」探民情
香港號稱國際大都會，但針對老人、小童及殘障人士嘅輔助設施卻遠遠落後於鄰近地區。社聯行政總裁蔡海偉唔知係咪職業病，外遊時都掛住考察當地公共設施，發現香港好落後，好似男廁並無育嬰設施、入境櫃台無擺放老花鏡供有需要人士使用，佢擔心隨着人口急劇老化，設施未達無障礙要求，會窒礙長者及有需要人士參與社區活動。
日公共設施顯貼心
蔡海偉話，外遊時發現日本中部機場嘅男廁有貼心安排，每個坐廁旁都裝有扶手，而機場半數男廁格內裝有嬰兒架，助「帶子洪郎」如廁，呢啲都係香港欠奉。佢又發現日本機場嘅入境櫃台放有三款不同深度的老花鏡，方便有需要人士填寫表格時使用，好體貼，但本港出入境櫃台就無喇。
常帶七歲小姨甥外遊嘅蔡海偉，亦發現新加坡主題公園食肆嘅男洗手間設有較矮嘅企廁和洗手盆。日本的二見海洋館更針對兒童成長概念設計，讓小童與海象和海豚親近。