政情：電費百零蚊 「星星」慳到盡
慳電慳到出神入化嘅環境局局長黃錦星（星星），上半年曾自爆為屋企訂下家規，規定晚上氣溫達攝氏廿八度先可以開睡房冷氣，多得一家四口都有嚴格遵守，今年四月電費只需繳交一百二十元。事隔半年，尋日星星屋企電費再創新低，又再自爆上月電費只需一百零一元。明明上月仲有啲日子高過廿八度，符合黃氏一家開冷氣要求，照計電費應該同半年前差唔多，究竟每月一百零一元電費單是怎樣煉成？
少開冷氣最有效
星星話，盡量開少啲冷氣就最有效，又建議市民最好揀番貼有一級能源標籤嘅雪櫃，因為雪櫃長時間耗電，如果揀能源效益較高嘅產品，累積慳到嘅電自然就愈多啦。被問到天然氣價格較低，會否影響來年電費，星星話能源價格係調整電費水平嘅考慮因素之一，下月港府會同兩間電力公司進行周年電費檢討，市民好快知道來年電費調整。不過，無論加幾多都好，用少啲電自然可以畀少啲電費啦。如果係咁，唔用電就唔使交電費添！