中環出更：懲署賣物會名人紛掃貨
由懲教署體育會主辦嘅秋季慈善賣物會，尋日喺赤柱監獄側足球場舉行，現場出售在囚人士製造嘅各種產品，吸引唔少識貨名人去尋寶。為開幕禮做主禮嘉賓嘅李錦記集團主席李文達夫人李蔡美靈話，去年佢喺度買咗張藤椅擺喺屋企花園，女兒坐過讚不絕口，所以今次佢一口氣掃咗六張，另加兩個咕o臣，都只係一千九百元，既抵買又可以做善事，好開心。
李太話，佢已經連續幾年嚟支持賣物會，以前一聽到懲教、監獄字眼就覺得好驚、好恐怖，但係接觸過之後印象完全改觀，尤其係社會各界多啲參與協助更生人士重投社會，特別有意義。除咗買嘢支持，李太仲試食在囚青年喺現場炮製嘅甜品，十分投入。
鄧達智大讚食品超水準
去年聖誕節開始退休前休假嘅懲教署前署長單日堅（單Sir）及太太都有到場，單太一見到入境事務處處長陳國基太太就攬頭攬頸，睇嚟兩人感情好好。單Sir笑笑口話，佢嘅休假即將正式結束，到時就開始食長糧，份糧只係相當於退休前人工嘅三分之一，難怪佢呻話遲啲會被扣糧喇！單太聽完爆料話，單Sir已經叫佢慳啲使喎！
時裝設計師鄧達智（William）都係賣物會嘅擁躉，今次就現身為烹飪比賽做評判，佢話次次嚟賣物會都一定會買曲奇餅，因為又平又好食，而且用料足，但就要好早到，事關好快就被搶晒。當日烹飪比賽參賽者係在囚人士，William對其中一款德國蘋果批讚不絕口，話水準拍得住出面餐廳喎！
卓妮