香港社會一片混亂、鉛水危機，房署有關官員明顯失職，對於承建商所採用嘅「無鉛焊料」，只憑包裝招紙便沒有檢測監管，咁求求其其唔出事至奇；果然係官到冇為話之佢！
除了鉛水危機，香港嘅教育危機，由大學至小學，每日風波不斷。最近嘅全港性系統評估（ＴＳＡ），尤其小三應否立廢ＴＳＡ，引來最大回響，近日便有兩間小學表示唔玩；立法會教育事務委員會將於本月二十九日召開公聽會作有關討論。身為教育局局長嘅吳得掂，理應出席解答議員嘅質詢。
然而，吳得掂竟官到無求睬你都傻，聲稱當天因「私人理由」不在港，只重申：ＴＳＡ有其不可或缺功能，不會輕言取消，阿哥，呢招係官到無求砸死蟹？
吳得掂嘅「私人理由」又冇交代清楚，若然係死人冧樓，相信冇人會懷疑佢迴避問題，之不過佢又廢噏話自己「好想出席」，如會議日期有彈性會更好。
算罷，香港繼續沉淪，「謀臣皆不盡其忠」，位高權重、高薪厚酬，可惜無能窩囊廢的一大堆，撇開「廢鑊」周一嶽，吳得掂都算係在高官中廢到湧住爭排名。
韓非子說：「夫物者有所宜，材者有所施，各處其宜，故上下無為。使雞司夜，令狸執鼠，皆用其能，上乃無事。」這幾句無非說事物各有自己的特性，人的才能各有不同的用武之地，事務、人才各處其位，因此，君主就能清靜無為；好比讓雞去報夜間時辰，讓貓捕鼠（古代稱貓為狸），各盡其能，國君就無庶務煩擾。
如今特區政府樣樣錯配，個個有事就卸責，香港亂成一鑊泡，高官只愕然攤手：搞到咁我都冇辦法o架！高官齊歡笑，發吓牙痕、官威，數數手指又出糧啦！