立法會大會尋日又再流會，今次仲要連立法會主席曾鈺成都唔喺會議廳，一班議員仲要藉口多多，話自己落區嘅又有，開會嘅又有，講明外出診症搵真銀都有，甚至因為感冒食咗藥而瞓着聽唔到鐘聲嘅都有。班議員咁繁忙，真係唔好做議員好過喇。同樣因外出開會而缺席會議嘅財務委員會主席、保險界議員陳健波流會後就話，自己願意帶頭減一半人工，希望其他議員跟隨，咁先對得住市民喎。唔知陳健波咁樣「晒冷」，係咪想平息市民對議員嘅憤怒呢？
