中環出更：廠商會青委 「勇」迎嘩鬼
中華廠商聯合會一班青委每逢大節日都搞派對聯歡，啱啱過咗嘅萬聖節都唔例外，廠商會常務會董楊華勇（Johnny）一如往年在清水灣大宅舉行哈囉喂派對，一班青委「嘩鬼」都悉心打扮現身。Johnny除咗預備大量大閘蟹應節外，楊太莊菲娜（Fiona）更廚神上身，預備咗多道正宗福建菜，祭一班嘩鬼嘅五臟六腑。
唔知係咪食正近日電視劇風潮，當日特別多人扮海盜，先有主人家Johnny一家大細扮成海盜家族，霸氣十足，名譽會董蔡少森扮張保仔亦維肖維妙，更笑言扮相太似一個賊，差啲入唔到屋喎。其餘各人亦出盡法寶，着上唔同服飾化身天使、魔鬼與各種卡通人物及英雄。
黃浩鈞珍藏蜘蛛俠漫畫
其中常董李世傑、會董孫榮良及太太Joyce、青委副主席黃浩鈞、委員史昊洺等夾埋一齊扮成恐龍戰隊，蒙住個頭出場充滿喜劇感，勾起大家童年回憶。講起最愛嘅英雄及卡通人物，楊華勇話至愛蝙蝠俠，黃浩鈞就鍾情蜘蛛俠，話一嚟鍾意藍色，二嚟蒙住面夠神秘，佢仲收藏咗百幾本蜘蛛俠嘅漫畫喺床底，部分已經有廿幾年歷史，成套可能好值錢。
除咗英雄及鬼怪，亦有人扮IQ博士嘅小雲及壞蛋掌門人等受歡迎動畫角色。青委副主席王詩雅記起，細個被父母罰企門外，聽到細佬喺屋入面睇緊超人好開心，但超人竟然唔拯救佢，令佢好失望。會員許穎嘉及Fiona則謂美少女戰士係每個八十後女仔嘅集體回憶。
卓妮