香港一向以國際都會自居，英語係法定語言之一，表面上似乎好國際化，可惜只係假象咋，如果話港人嘅英語水平仲低過日本甚至越南，你信唔信吖？
唔係講笑o架，有教育機構針對全球七十個國家及地區嘅調查顯示，香港成年人嘅英語能力僅排於全球第三十三位，比去年跌兩級；喺亞洲亦只能排於第九位，比去年跌咗一級，同亞洲排名第一嘅新加坡固然無得揮，更首次輸畀越南，只屬中級水平。以整體排名計，香港話就話仍然高過中國內地，但如果以城市計，香港已經低於上海同北京，講起真係失禮。
點解會咁？有學者根據本身嘅教學經驗，發現大部分港人唔敢講英語，外地學生經常會積極主導討論，反而本地學生唔敢參與；學者建議老師應以鼓勵嘅態度培養學生學習興趣喎。
冇錯，學習語言最緊要多聽多講，如果唔敢開口講，一味紙上談兵，英語水平點可能提高吖。以前有項本地調查亦顯示，七成受訪僱主認為在職人士英語水平下降，證明呢個問題已經唔係一朝一夕嘅事。講到底，教育質素每況愈下，正正係英語水平不斷下跌嘅主要原因。回歸後港府好大喜功，教改一浪接一浪，結果愈改愈亂，尤其係母語教學更加弄巧反拙，搞到母語唔得，英語又唔掂。有人形容香港教育不中不西，不倫不類，真係冇講錯o架。
所以話，港產官僚眼高手低，誤人子弟。就以全港性系統評估（TSA）嚟講吖，教育局一直強調評估成績唔會影響學校排名及學生升學，可惜講者自講，學校喺教育局嘅無形壓力之下，瘋狂操練學生，令老師及學生負擔大增，引起家長及教育界怨聲載道。有調查發現，大部分家長認為系統評估無助提升知識，反而造成極大壓力及困擾，唔少家長甚至認為子女壓力指數爆錶添。你話嘞，教育局無事生非，係咪添煩添亂吖？
唔怕唔識貨，最怕貨比貨。香港同新加坡有好多相似嘅地方，都曾經係英國殖民地，都係以華人為主嘅社會，以前不相伯仲，依家高下立見。新加坡教育搞得有聲有色，學生英文又得，中文又好，唔少人仲可以講幾種方言添；反觀香港教育七國咁亂，中文水平本來已經不如人，家陣連英文水平亦被人愈拋愈遠，想唔認輸都唔得，唔怪得近年香港嘅國際排名幾乎全部輸畀新加坡喇。
一沉俱沉，港人英語水平下跌，可以講係回歸後樣樣沉淪嘅縮影。香港係高度開放嘅經濟體，過去主要靠國際貿易起家，今日連英語都唔掂，又點樣發展及生存呢？難為港產官僚仲話要喺「一帶一路」中擔任「帶路」角色，簡直唔知個醜字點寫！