睇娛樂八卦新聞，常見到有啲二、三線影星在藝海浮沉唔上唔落，於是改吓藝名求轉運，亦有啲o靚模，為了有更好嘅事業而走去改名。其實，女星、o靚模改名求轉運，依老朽話，不如踏實些，隆胸改事業線，更會凸顯自己及有錢途。
講開又講，藝人改名求轉運，靈唔靈老朽冇調查過，不便亂噏廿四；之不過，近年因管理不善醜聞不斷、服務質素不斷下降而經常被抨擊嘅國泰，就話換新標誌喎。新標誌全綠底加反白icon，紅線冇咗，表面睇來冇咁惹火。不過，以國泰近期混亂事件層出不窮，唔係故障延遲起飛，就係「超賣」搞到客畀咗錢都冇機位，或者買了商務位被迫降至特選經濟客位，如此貨不對辦，咁多無厘頭事故，國泰不如改名好過換新標誌。不是嗎？人哋「國泰」就「民安」，你哋卻「國泰」而乘客「難安」也。
若然一間航空公司搞成咁，如此不以客為尊嘅服務態度，講真，怎改標誌都洗唔甩其劣質管理也！
國泰搞咁多花臣，網民嘲其以環保為名，「縮皮」為實，批評其服務質素同樣「被簡化」，真是一語中的。
國泰排名由全球第一跌到落第三，如果一直小學雞式管理下去，誠信破產醜聞愈爆愈多，換標誌冇咗紅線，一樣係惹火冇運行。網民講得好，與其泵水花一筆錢換所謂嘅新裝，又搞到咁核突，不如將呢筆「換裝費」用來改善吓服務質素，好似訓練吓員工如何對待乘客，做好餐飲及機艙服務仲實際喇。
有道是「流氓不可怕，就怕流氓有文化」，一個機構做衰咗唔怕認，知恥近乎勇，最怕死撐又自以為有文化整色整水，又唔真正改變其運作及服務質素，齋搞一些外表嘅嘢，再換多幾次標誌，老朽恐其依然飛唔出彩虹也。