政情：收料站：醫委會改選 五揀二激鬥
負責監督全港註冊醫生嘅香港醫務委員會，十二月將有一場選戰，今次因有兩名委員嘅任期於明年一月屆滿，分別係威爾斯親王醫院婦產科部門主管張德康，及醫學會副會長陳以誠，因此要進行改選。據聞張陳二人會角逐連任，另有三人新增加入戰團，包括近期於公立醫院醫生額外加薪百分之三一役中，搶盡風頭嘅公共醫療醫生協會會長陳沛然，另外兩人亦係醫生工會現任或前任會長，分別係公共醫療醫生協會前會長佘達明，及西醫工會會長楊超發。
陳沛然不容忽視
有政界中人分析指，張德康同陳以誠要成功連任一啲都唔容易，單係講陳沛然，佢喺今次公立醫院高級醫生加薪風波中，唔單止發動咗近十年來最大規模嘅靜坐，有逾千人響應參與，仲獲得主管至前線醫生、兩大醫學院院長及教授老中青三代支持，實力真係不容忽視。
雖然預期今次醫委會改選「五揀二」嘅戰況將會十分激烈，但亦有人以平常心看待，好似張德康就笑笑口話，一切交畀選民決定，選唔到咪返屋企休息，認真睇得開。