政情：建制攬炒 民望插爆
今年六月政改方案喺立法會表決時，建制派因為要「等埋發叔」而離開會議廳，最終甩轆收場，令政改方案戲劇性失敗收場。其後建制派WhatsApp對話內容外洩，更將建制派嘅醜態表露無遺。最新調查顯示，政改之後建制各黨派民望齊齊插水，當中以建制派最大黨民建聯評分跌幅最大，其次就係工聯會，新民黨就跌至二○一一年二月首次上榜以嚟嘅新低。唔通民建聯主席李慧琼、工聯會會長林淑儀及新民黨主席葉劉淑儀諗住學電影《鐵達尼號》咁，玩「You jump，I jump」﹖
民建聯跌最甘
香港大學民意研究計劃喺上個月十九至廿三日就本港政團嘅支持度評分訪問咗約一千名市民，調查發現不論泛民定建制派，評分一律都喺不合格水平，建制派政團嘅民望更加係全線下跌。其中民建聯嘅評分跌幅最大，同今年四月底至五月初進行嘅同類調查相比，大幅下跌咗七點二分至四十一點八分。工聯會就由四十八點二分下跌五點二分至四十三分，唔知係咪同之前該黨立法會議員陳婉嫻協助十二歲無證男童懷仔事件有關。
新民黨創新低
而喺過去幾次同類調查中「失蹤」、今次先至重新上榜嘅新民黨，評分就下跌至二○一一年二月以嚟嘅新低，僅得三十八點五分。
其實建制派喺政改方案一役甩轆，令政改方案最終以八票贊成、二十八票反對被否決，成為國際大笑話，作為建制派班長嘅民建聯立法會議員葉國謙可以話係責無旁貸。正當建制派就事件互相指摘、嘲諷之際，又連環爆出佢哋嘅WhatsApp群組對話內容洩密事件，再一次令事件發酵。
點知喺政制發展冇甚建樹嘅建制派，就連喺民生方面亦都後知後覺。七月份民主黨踢爆啟晴邨公屋住戶食水含鉛超標事件，其後泛民又喺立法會提出引用特權法調查鉛水事件，建制派可謂進退失據，輸足九條街。
建制派想大翻身，睇怕都要諗諗計，或者去買個風車轉吓運至得喇！