中環出更：阿Ann明笑姪仔 暗嘲局長
今時今日嘅年輕人，總係被批評搵唔到人生方向。立法會議員蔣麗芸（阿Ann）好有同感，佢自爆姪仔到咗二十幾歲，先發現做酒保嘅興趣，依家正喺韓國發展事業，總算搵到人生方向。不過話口未完，阿Ann笑笑口話，唔知姪仔究竟係去「蒲」定係工作喎！
力推生涯規劃不獲理
阿Ann話，從姪仔身上發現生涯規劃有幾重要，惟香港有唔少年輕人投身社會數年後，仍然欠缺方向，所以佢提出強化職業教育配合生涯規劃嘅建議已有一段時間，但係三個與生涯規劃有關嘅政策局局長一直無搵佢商討，包括教育局局長吳克儉、勞工及福利局局長張建宗以及商務及經濟發展局局長蘇錦樑。難怪阿Ann頗有微言，暗批佢哋懶理青年問題。
講完青年問題，阿Ann話鋒一轉，落力推銷佢手提電話後嘅手指扣環。佢話早前喺鴨寮街買咗二十個，但迅速送完，非常搶手。後來有同事發現網上買仲抵，於是大手買入一百個，依家長期放喺座駕內，方便隨時送畀人喎。
卓妮