中環出更:AO齊撐場 餞別鄧國威

三個幾月前,公務員事務局前局長鄧國威及民政事務局前局長曾德成突然「被辭職」,曾經令人擔心影響公務員士氣。尋晚由AO政務官組成嘅政務主任協會(協會)為鄧國威搞歡送晚宴,唔止係協會相隔十四年後首次為個別人士舉行送別派對,仲有逾二百名高官抽空出席。睇嚟鄧國威人緣唔錯,仲令大家更齊心添!

派對喺灣仔皇朝會舉行,筵開廿二圍,出席高官包括政務司司長林鄭月娥、財政司司長曾俊華、政制及內地事務局局長譚志源等人,仲有數唔晒嘅政策局常任秘書長及退休高官,例如運輸及房屋局常任秘書長應耀康、港鐵公司事務總監蘇家碧等人。啱啱交出史上最差外匯基金投資成績表嘅金管局總裁陳德霖、鄧國威嘅哥哥審計署前署長鄧國斌都有出席。場面咁墟冚,相信身兼協會主席嘅教育局常任秘書長黎陳芷娟出咗唔少力。

鄧國威見咁多同事嚟撐場,梗係好開心。佢話做公務員超過三十年,獲益良多,仲大讚呢份係好工,絕對無後悔咁話。咁退休生活點打發?佢笑笑口話依家可以享受自由,有更多時間去行山、旅遊同食嘢喎!

港人英語能力降 楊立門唱反調

間中接即時傳譯工作嘅民政事務局前常任秘書長楊立門(Raymond)都有到場,講起港人嘅英語能力下降,Raymond唔認同,反而覺得近年香港普遍英語程度有所改善,仲話全世界無地方好似香港要學習兩文三語,所以香港小朋友一啲都唔差。

卓妮

第一手消息請下載on.cc東網iPhone/iPad/Android/Windows Phone Apps