有個笑話係咁嘅，餐廳老闆見生意冷清，於是慨嘆︰點解應該嚟嘅客人冇嚟？食客以為諷刺佢哋唔應該嚟，走咗一半；老闆又嘆︰點解唔應該走嘅走晒？剩番嘅一半食客又以為諷刺佢哋應該走，紛紛離去。呢嗱，該走嘅不走，不該走嘅冇得留低，咪就係平機會嘅寫照囉！
話說周一嶽之前建議就異性及同性「事實婚姻」立法，當時擔任總平機主任嘅束健銘被指動員教友去信平機會，提出反對意見，結果被變相炒魷並不獲發約滿酬金，束健銘入稟勞資審裁處，尋日被判勝訴，平機會除咗要發還八十多萬元約滿酬金，仲要畀埋訟費，呢鋪真係賠了夫人又折兵咯。
聽吓個官點判。佢話喎，束健銘係以個人身份出席教會活動，言論自由受到《基本法》保障，亦同佢嘅工作表現無關；而平機會嘅內部調查報告更加唔符合自然公正法則，無論係程序同報告內容本身都有不足及疏忽之處咁話。
冇錯嘞，當初束健銘被炒，周一嶽已經畀人話係打擊異己，挾怨報復，家陣審裁處判平機會敗訴，證明周一嶽唔止容不得異見，仲要做埋無良僱主，簡直離晒大譜。正如束健銘話齋，平機會不公不平，周一嶽作為阿頭，應該謝罪下台。
正所謂，自作孽，不可活，搞成今日咁，完全係周一嶽咎由自取。當初佢老哥話要就性傾向歧視、「族內歧視」等進行立法諮詢，已經搞到滿城風雨，爭拗多多，唔單止法律界質疑越權，連佢自己都承認超出平機會法定職能權限，「知難而進」就話精神可嘉啫，周一嶽無事生非，「知錯而行」，呢啲咪就係陸雲亭睇相，唔衰攞嚟衰囉。
冇計喇，周一嶽冇嘢叻，最叻就係搞風搞雨，添煩添亂，為官食衞局長七年，搞到醫療食安事故無日無之，市民有口皆「悲」，估唔到港府對呢舊廢電池情有獨鍾，係都要翻閹佢出掌平機會，結果有目共睹，呢條廢柴將「每周一鑊」嘅精神發揚光大，辦正事唔見佢咁積極，攬權自肥就鬼打都冇咁精神，唔係加人加位，就係密謀細屋搬大屋，將總部搬去甲級寫字樓，直頭當納稅人係提款機。平機會形象本來就差，喺周一嶽領軍下繼續尋底，唔怪得早排針對法定機構嘅民意調查，平機會嘅支持度淪為包尾大幡喇，正一沒有最衰，只有更衰！
都係毛伯伯呢兩句詩最啱佢︰「借問瘟君欲何往，紙船明燭照天燒。」係嘞，港府咪話公開招聘平機會主席嘅，唔趁呢個機會將瘟神掃地出門，仲等幾時吖！