「好打得」嘅政務司司長林鄭月娥最近特別「多愁善感」，李清照「沉醉不知歸路」，也不過是「興盡晚回舟，誤入藕花深處。爭渡、爭渡，驚起一灘鷗鷺。」今林鄭係咁意出口都成金句，繼「官到無求膽自大」外，於一個賣物會活動時又「有感而發」：家陣嘅政府，若果堅持做「正義」工作往往會被責難！
真係可憐的陰功豬，做到特區政府第二把手，都咁多牢騷，唉！牢騷太多防腸斷，都係用「感觸」好啲；咁你話一般活在底層嘅市民，面對衣食住行樣樣難，根本冇機會做「正義」嘅事，普羅市民，自然永世不會被責難，即使想做「義工」，都要為柴米油鹽醬醋茶憂愁，你估真係好似政府宣傳片咁，叫市民提供未來一年施政報告嘅意見，用咗一家人吃飯，個個有唔同主意，一個話要「和牛」，一個話叫「燒腩仔」……嘩，係唔係咁好環境啊？
阿哥！老朽冇咁多「正義」事好做，一生勞勞碌碌，勤勤奮奮，無非求「渴飲飢食無別事，寒來向火暖乘涼」，如此而已，可惜當今社會撕裂，日日嘈到冇時安寧。想有安樂茶飯難矣！
言歸正傳，林鄭之嘆，亦不過「好官難做」。好官難做，大不了辭官歸故里，再享倫理家庭之樂！何況林鄭又得到上帝眷顧，佢話「真福八端」其中第八端非常適合佢：「為義被難真有福，因為天堂已經預咗個位畀我。」既知生又知死，人生如此般渺小，林鄭居然能窺見宇宙之真理，可見其神。
孔子係聖人，在世時被譽為「天縱之聖」、「天之木鐸」，之不過，佢都話「未知生，焉知死」，而林鄭卻已在天堂「預咗個位」，生死都能掌握認真犀利！如此神的高官，香港點會冇得救，二○一六年施政諮詢，老朽慳番啖氣，睇吓今晚有冇燒腩仔或和牛食先！