特首梁振英及財政司司長曾俊華（鬍鬚曾）今日開始陸續約見政黨，諮詢《施政報告》及《財政預算案》意見，所以鬍鬚曾尋日連出四個活動，今日就坐定定聽人講。
佢朝早首先去咗一個會計師研討會，中午就出席財經論壇午餐會，傍晚去會展一連出席社企民間高峰會及一個親中團體成立典禮。鬍鬚曾到場通常都會發言，講嘅嘢都不外乎嗰三幅被，不過喺午餐會，佢就多次用比喻搞gag，唔知係咪怕台下食晏食到悶呢？
鬍鬚曾就話，自己雖然大學讀建築，但係喺研究院及擔任公職三十幾年，接觸最多嘅反而係經濟。
經濟學一個非常有趣嘅地方，就係呢個係唯一一個學科，可以由提出完全相反理論嘅學者同時贏得諾貝爾經濟學獎，就係二○一三年三名得主，對市場上資本價格合理性有南轅北轍解讀，而兩位經濟學者隨時有三種唔同意見，仲話經濟學家所用水晶球嘅型號，全部都唔同。
至於各國關注美國加息，鬍鬚曾形容好似係一套等完又等嘅連續劇，一早知道結局，但係未知道上演日期。佢早前訪美，紐約聯儲銀行總裁杜德利都話，呢次好可能係歷史上講得最長、最多嘅一次加息。