中環出更：陳維安呻做官又苦又辣

人生長流流，每個人總會經歷甜酸苦辣嘅滋味。不過律師會前會長黃嘉純（Lester）早前出席一個活動時，話佢仲未經歷過苦同辣喎！同場嘅立法會秘書長陳維安（Kenneth）聞言即刻話：「梗係啦！你都未做過政府！」唔通Kenneth做教育局副局長時嘅壓力好大？

Kenneth講到人生甜酸苦辣時話，讀小學時功課少，老師及同學都好好，所以成個童年嘅回憶係甜嘅多。佢一直讀男校，到大學時先開始拍拖，嗰陣就嘗過酸嘅滋味，後來加入政府就「又苦又辣」喎！不過，卓妮唔明白，點解拍拖嘅感覺係酸嘅？照計唔係甜就係苦嘅咩！

唔講唔知，原來Kenneth同Lester由細識到大，佢哋一個讀拔萃，一個讀喇沙，兩間學校「由細打到大」喎！Lester話，學校打交就唔會攞「架生」，但以前喺又一村附近有個掘頭路位，就成日有人攞晒「架生」打交，佢細個都要避開咁話。

卓妮