政情:「光」談造反 暗撐學生

近日本港大學生就廢除特首校監必然制、檢討校董組成方法鬧得滿城風雨,甚至圍堵會議室阻止校董會議進行。已沉寂一段時間嘅行政會議召集人林煥光(WK),尋日去中文大學出席講座,喺呢個敏感時刻對超過一千名大學生大談「造反有理」,又話做領袖管治不可像古代皇帝咁嚴苛,否則必定「死硬」。莫非WK不滿政府管治,又支持學生造反有理?WK就否認借古諷今、批評現今政局之意,真係講都無人信!

矢口否認借古諷今

WK以「一七八九年豐裕號商船叛變事件:造反有理?」即《叛艦喋血記》為題,分析當年英國商船前往大溪地進行任務回航時,所發生嘅叛變事件。船員上岸五個月後紀律變得鬆散,但艦長着重紀律,但急功求成,要加快航程,常向船員用笞刑。最後副手帶頭造反控制商船,將艦長和其跟隨者共十九人趕離商船。副手再將商船駛至無人島過新生活,但其後喺島上再爆發衝突,最終副手亦死於非命。

WK認為,現今領袖用權要用得其法,若套用古代皇帝嘅管治方法,必定「死硬」。不過,佢話以此故事為領袖培訓而準備,並無借古諷今、批評現今政局之意,但明言故事主旨係希望社會思考和探討如何運用權力,及運用權力時嘅意識。佢認為商船事件令後人改善管理方法,海軍軍官往後嘅執法會置公義於高位,令下屬心服。佢更稱從歷史角度而言,嚴苛方式係需要,但不能忽略公義。

叛變故事 攬炒收場

中大政治與行政學系高級講師蔡子強相信,WK準備此故事為大學生分享定必有其意思,只係WK驚會惹來批評先矢口否認。而喺講座上,亦有學生質疑WK藉故事批評特首梁振英嘅管治。到底係話中有話、含沙射影,相信只有WK一人至知道,但以此題目同學生分享,好難唔令人有所聯想。不過,事件中嘅商船副手最後都係無好下場,莫非WK寧為玉碎、不作瓦全,都要玉石俱焚?

其實WK與政府唱反調或對着幹早有前科,包括喺二○一三年時任平等機會委員會主席時,曾要求特首於施政報告提出如何保障不同性傾向人士免受歧視。而同年發生嘅免費電視發牌風波,WK亦批評政府做法與市民期望落差過大,建議特首需深切檢討。

第一手消息請下載on.cc東網iPhone/iPad/Android/Windows Phone Apps